by 
Umusore wo mu Karere ka Nyagatare wiyitaga umumotari yatawe muri yombi akurikiranyweho gukwirakwiza amakuru y’ibihuha ku mbuga nkoranyambaga, aho yavugaga ko hari abamotari bari kwicwa bagasahurwa moto zabo.
Uyu musore yari yatangaje ubutumwa ku rubuga X (Twitter), avuga ko mu Murenge wa Rukomo no mu bindi bice bya Nyagatare hari ibikorwa by’ubwicanyi bukorerwa abamotari, aho batwarwa moto zabo nyuma bakicwa.
Mu butumwa bwe, uyu musore yavugaga ko:
- Abamotari bategerwa mu muhanda bakamburwa moto
- Hari abicwa nyuma yo kwamburwa
- Ababikora bahungira mu gihugu cya Uganda
- Ndetse avuga ko hari n’abishwe bakanakurwamo amaso
Yanavuze ko ibi bikorwa byabaga cyane ku muhanda uhuza Kabasazi na Rukomo, anashinja ubuyobozi kudafata ingamba.
Aya makuru yakwirakwijwe byihuse ku mbuga nkoranyambaga, atera impungenge abaturage.
Icyakora, Polisi y’u Rwanda yahakanye aya makuru ivuga ko ari ibihuha bidafite ishingiro.
Polisi yatangaje ko uwatangaje aya makuru yamaze gufatwa, kandi ko akurikiranyweho icyaha cyo gukwirakwiza ibihuha hifashishijwe ikoranabuhanga.
Yibukije abaturage ko gukwirakwiza amakuru atari yo bishobora guteza umutekano muke, kandi ko bihanwa n’amategeko.
