Umuhanzikazi Tems yakuyeho agahigo ka Tyla kuri Spotify

Umuhanzikazi wo muri Nigeria, Temilade Openiyi uzwi cyane ku izina rya Tems, yongeye kwandika amateka mu muziki wa Afurika nyuma yo kuba umuhanzi wa mbere muri Afurika ufite abamwumva benshi buri kwezi ku rubuga rwa Spotify.

Tems uzwi mu ndirimbo zirimo Love Me Jeje, amaze kugera ku bantu miliyoni 38.3 bamwumva buri kwezi kuri Spotify, arusha mugenzi we wo muri Afurika y’Epfo, Tyla, ufite miliyoni 38.2.

Iri zamuka rije rikurikira isohoka ry’indirimbo nshya ndetse n’imikoranire ikomeye yagize mu minsi ishize.

Mu byamufashije kuzamuka harimo indirimbo nka What You Need (Colour version), Bounce Road Blues yakoranye na J. Cole ndetse na Future, hamwe na Raindance yakoranye na Dave, ikomeje kwigarurira imitima ya benshi ku isi.

Si ubwa mbere aba bahanzi bombi bahatanira imyanya ya mbere kuri Spotify. Tyla ni we wari ufite agahigo ko kuba umuhanzi wa Afurika wageze ku bantu benshi bamwumva buri kwezi, aho yigeze kugera kuri miliyoni 40.