by 
Rayon Sports yanganyije na Al Hilal SC igitego 1-1 mu mukino wari urimo ishyaka ryinshi ku mpande zombi, wabaye kuri uyu wa Gatatu, tariki ya 25 Gashyantare 2026, kuri Kigali Pelé Stadium.
Al Hilal SC yinjiye muri uyu mukino, ndetse ku munota wa kabiri ikinira mu rubuga rwa Rayon Sports, inabona igitego cya mbere cyatsinzwe na Abdelrazig Taha, waherejwe umupira na Jean Claude Girumugisha.
Iki gitego cyavuye ku ikosa ryakozwe na Aziz Bassane washatse gukura umupira imbere y’izamu awutera nabi ufatwa na Girumugisha wamucenganye na Uwumukiza Obed abona kuwutanga.
Al Hilal SC yakomeje no gushaka ikindi gitego ikoresheje uruhande rwa Girumugisha n’urwa Adama Coulibali, bazengerezaga ubwugarizi bwa Rayon Sports ariko Bayisenge Emery na Ramazani Tshimanga bakahagoboka.
Ku munota wa 37, Aziz Bassane yinjiye mu rubuga rw’amahina rwa Al Hilal SC, ariko Ernest Luzolo amushyira hasi, umusifuzi Nsabimana Celestin ahamya ko nta kosa ryabayeho areka umukino urakomeza.
Igice cya mbere cyarangiye Rayon Sports iri inyuma, ariko icya kabiri igitangirana imbaraga ari na ko ibyaza umusaruro umurindi w’abafana bayo bari buzuye muri Kigali Pele Stadium.
Umukino ugeze ku munota wa 59, Adama Coulibali yazamukanye umupira yinjira mu rubuga rw’amahina, asubiza inyuma ahereza mugenzi we Yasir Awad, ariko ateye mu izamu unyura hejuru yaryo gato.
Rayon Sports yashoboraga kubona igitego ku munota wa 63 ubwo Mugisha Didier yaherezaga umupira Aziz Bassane ari imbere y’izamu wenyine, ariko ananirwa kuwutereka mu izamu kugeza Madicke Kane awushyize muri koruneri.
Umutoza wa Rayon Sports, Bruno Ferry, yakuye mu kibuga Tambwe Gloire wari wananiwe kwisanga muri uyu mukino, ashyiramo Faustin Likau wagiye kongera imbaraga mu kibuga hagati.
Kwizera Olivier wari mu izamu rya Rayon Sports yari afite amafiyeri menshi nk’uko bisanzwe, kugeza ubwo imipira imwe n’imwe yatakazaga yashoboraga gutuma itsindwa igitego cya kabiri.
Likau wari winjiye mu kibuga asimbuye, yaboneye Rayon Sports igitego cyo kwishyura ku munota wa 77, ku mupira yahawe na Richard Ndayishimiye wasimbuye Yannick Bangala, awushyira ku mutwe umunyezamu wa Al Hilal SC ntiyamenya aho unyuze.
Rayon Sports yahise igira imbaraga zidasanzwe icurika ikibuga itangira gusatirana imbaraga, ndetse ku munota wa 89 yagerageje uburyo ku ishoti rikomeye rya Richard Ndayishimiye, ariko rinyura hejuru y’izamu.
Ku munota wa 90, Aziz Bassane yahawe ikarita y’umuhondo ya kabiri muri uyu mukino, ahita yerekwa ikarita y’umutuku asohoka mu kibuga.
Gikundiro yujuje imikino itanu idatsindwa, yagize amanota 36 ku mwanya wa gatanu. Aya iyanganya na Police FC ya kane yanganyije na Rutsiro FC 0-0, mu mukino wabereye mu Karere ka Rubavu.
