by 
Ikipe y’igihugu cya Maroc ihabwa amahirwe menshi yatangiye urugendo neza aho ibitego bya Brahim Díaz na Ayoub El Kaabi byafashije iyi kipe gutsinda Ibirwa bya Comores ibitego 2-0, mu mukino ufungura Igikombe cya Afurika cya 2025.
Ni umukino waberaga muri Maroc, rikaba ryatangiye kuri iki Cyumweru tariki ya 21 Ukuboza 2025, aho rizarangira ku ya 18 Mutarama 2026.
Igice cya mbere cy’uyu mukino cyarangiye amakipe yombi anganya ubusa ku busa ariko ubwo bagarukaga mu kibuga mu gice cya kabiri, ikipe ya Maroc yatangiranye imbaraga, Mazroui ahindura neza umupira imbere y’izamu usanga Brahim Diaz atsinda igitego cya mbere ku munota wa 55.
Ikipe y’Ibirwa bya Comores yashobora kwishyura igitego nyuma y’iminota itatu, ku mupira Rafiki Saïd Ahamada yazamutse wenyine yihuta asigaranye n’umunyezamu Yassin Bono atera agapira gato uyu munyezamu aragafata.
Iyi kipe yari mu rugo yakomeje gukina neza no gukora impinduka aho ku munota wa 74, Maroc yahinduye umupira mwiza imbere y’izamu, Ayoub El Kaabi arigarama atsinda igitego cya kabiri.
Umukino warangiye Maroc yatsinze Ibirwa bya Comores ibitego 2-0 itangira intsinzi Igikombe cya Afurika ihabwa amahirwe yo kwegukana.
Iri rushanwa rizakomeza ku wa Mbere, tariki ya 22 Ukuboza 2025, aho Mali izakina na Zambia saa 16:00, Afurika y’Epfo izakira Angola saa Moya, mu gihe saa 22:00 Misiri izakina Zimbabwe.
