APR FC yageze ku mukino wa nyuma w’Igikombe cy’Intwari 2026 nyuma yo gutsinda AS Kigali

Ikipe ya APR FC yatsinze AS Kigali ibitego 3-0 bya Hakim Kiwanuka, William Togui na Ruboneka Jean Bosco, igera ku mukino wa nyuma w’Igikombe cy’Intwari cya 2026.

Uyu mukino wabaye ku mugoroba wo ku wa Gatatu, tariki ya 28 Mutarama 2026 kuri Kigali Pelé Stadium aho igice cya mbere kidashamaje cyarangiye amakipe yombi anganya ubusa ku busa.

Ku munota wa 59 nibwo Kiwanuka wari wagerageje uburyo bwinshi, yafunguye amazamu maze atsinda igitego.

Muri iyi minota iyi kipe yasatiraga bikomeye, bidatinze ku munota wa 69, rutahizamu William Togui yatsinze igitego cya kabiri cyiza ku mupira yahawe na Kiwanuka.

APR FC yongeye kuzamuka yihuta, Kiwanuka wagize umukino mwiza cyane aha umupira Ruboneka Jean Bosco atsinda igitego cya gatatu ku munota wa 78.

Umukino warangiye APR FC yatsinze AS Kigali ibitego 3-0 igera ku mukino wa nyuma w’Igikombe cy’Intwari cya 2026.

Ikipe y’Ingabo izahura n’izava hagati ya Rayon Sports na Police FC ziraza gukina kuri uyu wa Kane, Saa Cyenda kuri Kigali Pelé Stadium.

Inkuru ya IGIHE