Abanye-Sudani bakomeje kubonera ibyishimo i Kigali nyuma yo gutsinda Saint-Éloi Lupopo bagakomeza muri 1/4

Al Hilal SC yo muri Sudani yatsinze FC Saint-Éloi Lupopo igitego 1-0, igera muri 1/4 cya CAF Champions League ku nshuro ya kabiri yikurikiranya.

Uyu mukino wa nyuma wo mu itsinda rya gatatu wabereye muri Stade Amahoro, ku wa Gatandatu, tariki ya 14 Gashyantare 2026.

Iyi kipe yo muri Sudani yazamukanye umupira neza, myugariro wo ku ruhande rw’iburyo, Steven Ebuela azamuka yihuta atera ishoti rikomeye atsinda igitego cya mbere ku munota wa 27.

Umukino warinze urangira ari igitego 1 cya Al Hilal SC ku busa bwa Saint-Éloi Lupopo. Bityo Al-Hilal SC ikomeza muri 1/4 cya CAF Champions League, icyiciro yagarukiyemo umwaka ushize.

Saint-Éloi Lupopo yagiye muri uyu mukino ibura abakinnyi barindwi ndetse n’umutoza mukuru Guy Bukasa utatoje. Nubwo bimeze bityo yasabwaga gutsinda igakomeza, mu gihe indi no kunganya byari bihagije ngo ikomeze muri 1/4.