Abakunzi ba Rayon Sports ntibabashije kubona ibyishimo bari biteze ku ikipe yabo yujuje umukino wa kane nta ntsinzi

Ikipe ya Rayon Sports yanganyije na Mukura VS igitego 1-1 mu mukino w’Umunsi wa 15 wa Rwanda Premier League wabereye i Muhanga, yuzuza imikino ine ikurikiranye idatsinda.

Gikundiro yasoje imikino ibanza ifite amanota 26 ku mwanya wa karindwi, irushwa amanota icyenda na Al-Hilal SC ya mbere (yo ifite ibirarane bibiri).

Ni mu gihe Mukura VS yasoje imikino ibanza iri ku mwanya wa gatandatu n’amanota 27.

Iyi kipe yambara ubururu n’umweru iheruka intsinzi kuri AS Muhanga, mu gihe nyuma yaho yatsinzwe na APR FC na Al-Hilal, mbere yo kunganya na Al-Merrikh na Mukura VS.