MINEDUC yasabye École Belge de Kigali kuva kuri porogaramu y’imyigishirize y’u Bubiligi

Minisiteri y’Uburezi (MINEDUC) yamenyesheje ubuyobozi bwa École Belge de Kigali ko kuva mu kwezi kwa Nzeri 2025, iri shuri rigomba guhagarika gukoresha porogaramu y’imyigishirize y’Ababiligi. Ibi byatangajwe mu ibaruwa MINEDUC yohereje ku bayobozi b’iri shuri, barimo Richard Rwihandagaza, Umuyobozi w’Ababyeyi na Perezida w’Inama y’Ubutegetsi, ndetse na Delphine Vico, Umuyobozi w’iri shuri.

Iyi baruwa yohererejwe kuri uyu wa 08 Mata 2025, ikaba ije nyuma y’icyemezo cyafashwe na Guverinoma y’u Rwanda mu bijyanye n’imikoranire na Guverinoma y’u Bubiligi, aho yemeje ko umubano hagati y’ibihugu byombi utagomba gukomeza mu rwego rw’ishoramari mu myigishirize. MINEDUC yashingiye kuri itangazo ry’Urwego rw’Igihugu rw’Imiyoborere (RGB) ryo ku wa 27 Werurwe 2025, ryemeje ko imiryango itari iya Leta, yaba iya hano mu gihugu cyangwa mpuzamahanga, idashobora gukorana na Guverinoma y’u Bubiligi mu bijyanye n’imyemerere cyangwa inyungu rusange.

MINEDUC yatanze inama yo gutegura ibikenewe byose kugira ngo École Belge de Kigali yimukire ku bundi buryo bw’imyigishirize mu mwaka w’amashuri wa 2025-2026. Iyi minisiteri yijeje iri shuri ko izakomeza kurifasha mu rugendo rwo guhindura imikorere yaryo.

École Belge de Kigali, yatangiye gukorera mu Rwanda mu 1965, ikaba izwi cyane muri Afurika, aho ifite amashuri mu bihugu nka Burundi, Repubulika Iharanira Demokarasi ya Congo, ndetse na Maroc. Mu 2022/2023, ryigishaga abanyeshuri barenga 500, rikaba rifite abarimu 45.

Itangazo rya RGB ryakomeje rikangurira ibigo byashaka gukorana n’u Bubiligi kubahiriza amabwiriza, kuko uzanyuranya nayo azahanwa bikomeye, harimo no guhagarikwa cyangwa kwamburwa uburegangiza.

Ivomo: IGIHE.COM