by 
Terrence Howard, umukinnyi wa filime wamenyekanye cyane muri sinema ya Hollywood, aherutse gutangaza inkuru ikomeye ku bibazo bibera mu ruganda rwa sinema muri Amerika. Mu kiganiro kuri podcast ya Patrick Bet-David yitwa PBD Podcast, Howard yavuze ko yahuye n’ibibazo bikomeye mu ruganda rwa Hollywood, avuga ko Diddy, umuhanzi n’umunyabikorwa w’ibyamamare muri Amerika, yari yagerageje kumusambanya.
Howard yatangaje ko Diddy yamuhamagaye amusaba ko yamwigisha gukina filime, ariko akagera aho agasanga nta bikoresho byo kwifashisha byateguwe, ahubwo Diddy yamurebaga gusa nta kindi amubwira, ndetse nyuma amusaba gushyiramo umuziki. Howard avuga ko byaje kurangira nta kintu cyiza cyakozwe, kandi yaje gusobanukirwa ko Diddy atari amasomo ajyanye no gukina filime yashakaga, ahubwo yari afite intego yo kugirana imibonano mpuzabitsina na we.
Nubwo Howard yavuze ko Diddy atigeze amukorera ihohoterwa iryo ari ryo ryose, avuga ko ibyo Diddy yashakaga bitari byiza, ariko ko atamurega icyaha icyo ari cyo cyose. Yakomeje avuga ko muri Hollywood hari abantu benshi bemera gukora ibintu bidakwiriye kugira ngo bagere ku bukire no ku buhanga, avuga ko hari bamwe bemera “gutakaza ubugabo bwabo” kugira ngo bazamuke, ariko we yavuze ko atigeze yemera gukora ibyo atishimiye kugira ngo abone intsinzi.
Iyi nkuru ya Howard itangaza ko muri Hollywood hari ibikorerwamo bitagaragara ku maso, kandi bishobora gushyira abantu mu kaga. Kugeza ubu, itsinda ry’abanyamategeko ba Diddy ntabwo riratanga igisubizo ku birego byatangajwe na Howard. Diddy yatawe muri yombi ku wa 16 Nzeri 2024, akaba afungiye muri gereza y’i Brooklyn muri New York, aho ategerereje urubanza rwe ruzaburanishwa ku wa 5 Mata 2025.
