by 
Paris Saint-Germain yatsinze Angers igitego 1-0, yegukana Igikombe cya Shampiyona y’u Bufaransa habura imikino itandatu ngo irangire, ndetse kiba icya kane itwaye yikurikiranya.
Iyi kipe yagiye muri uyu mukino isabwa inota rimwe ikegukana iki gikombe gusa byarangiye iyabonye yose ibikesha igitego cya Désiré Doué cyo ku munota wa 55.
Ni ku nshuro ya gatatu ikipe yegukanye Ligue 1 habura imikino myinshi ngo irangire, aho n’ubundi aka gahigo gafitwe na PSG yabikoze mu 2016 ubwo haburaga imikino umunani. Mu 2007, Lyon yabikoze habura imikino itandatu.
Iki gikombe cyabaye Shampiyona ya 11 PSG yegukanye muri 13 ziheruka. Ni mu gihe muri rusange ari iya 13 yegukanye mu mateka.
Iyi kipe y’umutoza Luis Enrique imaze imikino 28 idatsindwa, aho iri gusatira agahigo Nantes FC yashyizeho mu 1995 ubwo yamaraga imikino 32 idatsinzwe.
Mu gihe yazabasha gusoza iyi Shampiyona idatsinzwe, PSG yaba ikipe ya karindwi yegukanye Shampiyona idatsinzwe nyuma ya Bayer Leverkusen yabikoze mu 2004, Juventus mu 2012, Arsenal mu 2004, AC Milan mu 1992, Perugia mu 1979 na Preston North End yabikoze mu 1889.
Paris Saint-Germain ikomeje no guhatana muri UEFA Champions League, aho muri ¼ izahura na Aston Villa ku wa Gatatu. Iyi kipe kandi iri ku mukino wa nyuma wa Coupe de France izahuramo na Reims mu mpera za Gicurasi.
Rutahizamu w’Umufaransa, Ousmane Dembélé, ni umwe mu nkingi za mwamba mu musaruro iyi kipe ikomeje kugira kuko amaze gutsinda ibitego 32 mu mikino 40 yakinnye mu marushanwa yose uyu mwaka.
