Amajyaruguru: Gushinganisha ibihingwa n’amatungo byashyizwe mu mihigo y’uturere

Guverineri w’Intara y’Amajyaruguru, Mugabowagahunde Maurice, yatangaje ko intara yihaye gahunda yo gushishikariza abaturage gushinganisha ibihingwa n’amatungo yabo, aho bafashe umuvuno wo kubishyira mu mihigo ya buri karere mu rwego rwo kongera umubare w’abafata ubwishingizi muri iyi ntara. Ibi bibaye nyuma y’uko Minisiteri y’Ubuhinzi n’Ubworozi igaragaje ko abishinganisha ibihingwa n’amatungo bari munsi ya 10% muri gahunda ya “Tekana Urishingiwe Muhinzi Mworozi.”

Guverineri Mugabowagahunde yavuze ko kugira ngo abaturage barusheho gufata ubwishingizi, bashyizeho ubukangurambaga bwimbitse bukorerwa mu mirenge yose, bagahura n’abahinzi, bakifashisha abajyanama mu by’ubuhinzi, ndetse no mu migoroba y’imiryango n’ahandi hose hashoboka. Yavuze ko umwaka ushize, mu mihigo y’umwaka, batangiye gahunda yo kwishingira amatungo 58,628, ariko nyuma y’umwaka, basanze bashinganishije amatungo ibihumbi 45, bituma bagera ku kigero cya 77%.

Mugabowagahunde kandi yavuze ko ku buhinzi, batageze gusa ku ntego bari bihaye mu kwishingira ibihingwa, kuko bari bafite umuhigo wo kwishingira hegitari 1188, ariko bakaba bashoboye kugeza ku hegitari 1435. Ibi byatumye bigaragaza ko gahunda yo kwishingira ibihingwa igenda neza, nubwo ikibazo gikomeye gihari ari uko ahantu henshi hahingwa ari ku misozi miremire, aho bashaka gushyiramo imbaraga kugira ngo n’abahinzi bato batabire iyi gahunda.

Kamugundu Claude, wororera mu Murenge wa Nkotsi, yavuze ko nyuma yo gusobanukirwa n’akamaro k’ubwishingizi, yashinze inka ze mu bwishingizi, ndetse ko yigeze gupfusha inka inshuro eshatu ariko agahabwa amafaranga n’ibigo by’ubwishingizi, bikamufasha kongera kugura izindi nka. Mpayimana Aloys, utuye mu Murenge wa Gataraga, we yavuze ko atari yabona ubuyobozi bumushishikariza gushyira umurima we w’ibirayi mu bwishingizi, asaba inzego z’ibanze kubegera bakabasobanurira ibyiza byo gushinganisha imyaka yabo.

Kugeza ubu, muri gahunda ya “Tekana Urishingiwe Muhinzi Mworozi,” Leta imaze gutanga arenga miliyari 5 Frw mu kuganira n’abafashe ubwishingizi, kuko ibatangira 40%, mu gihe abahinzi n’aborozi bamaze kwishyurwa arenga miliyari 6 Frw n’ibigo by’ubwishingizi.