by 
Ikipe ya Arsenal yatangaje ko myugariro wayo, Gabriel Magalhães, atazongera kugaragara mu kibuga muri uyu mwaka w’imikino kubera imvune yagize mu itako izasaba kubagwa. Gabriel, w’imyaka 27, yabanje mu kibuga mu mikino 28 muri 30 ya Arsenal mu mwaka wa Premier League w’uyu mwaka, kandi yafashije ikipe kuba ifite ubwugarizi bwiza, aho imaze kwinjizwa ibitego 25 gusa.
Imvune Gabriel yagize yabaye mu mukino Arsenal yatsinzemo Fulham ibitego 2-1 ku wa Kabiri, tariki ya 1 Mata 2025, kuri Emirates Stadium. Uyu mukinnyi yasimbuwe ku munota wa 16 w’uwo mukino, ndetse ikipe yahamije ko azitabwaho vuba, agamije gukira neza mbere y’uko umwaka w’imikino utaha utangira.
Arsenal yavuze ko Gabriel azahita atangira urugendo rwo gukira hagamijwe ko azagaruka ku rwego rwiza mu ntangiriro z’umwaka w’imikino utaha. Ubu Arsenal iri ku mwanya wa kabiri muri Premier League n’amanota 61, irushwa amanota 12 na Liverpool ifite umwanya wa mbere, mu gihe hasigaye imikino umunani.
Mu gihe Gabriel atari mu kibuga, Arsenal izakomeza gukina umukino ukomeye muri ¼ cya UEFA Champions League, aho izahura na Real Madrid, ifite igikombe giheruka. Umukino ubanza uzabera i Londres ku wa 8 Mata, mu gihe uwo kwishyura uzabera muri Espagne ku wa 16 Mata 2025.
