Umutwe wa Twirwaneho wifatanyije na M23 mu rugamba rwo gukuraho ubutegetsi bwa Kinshasa

Umutwe wa Twirwaneho uharanirauburenganzira bw’Abanyamulenge batotezwa ndetse bakicwa na Leta ya Repubulika Iharanira Demokarasi ya Congo, RDC, watangaje ko wifatanyije n’Ihuriro AFC/M23 mu rugamba rwo gukuraho ubutegetsi bwa Kinshasa bukomeje kwica abaturage.

Umuyobozi Mukuru mushya wa Twirwaneho, Brig Gen Charles Sematama yabwiye Ijwi rya Amerika ko Col Rukunda asize bakomeye ndetse urugamba yatangije bagomba kurusoza uko byagenda kose.

Ati “Tugomba gukora ku buryo twusa icyo kivi yatangije, icyo cyuho tukagiziba kuko n’ubundi twari dusanzwe dufatanya ndetse bizagenda neza.”

Ni icyemezo Twirwaneho ifashe nyuma y’iminsi mike uyu mutwe utangaje ko Umuyobozi Mukuru wawo Col Rukunda Michel uzwi nka Makanika, yaguye mu gitero cya drone y’ihuriro ry’ingabo za RDC ku wa 19 Gashyantare 2025.