MONUSCO yatangaje ko hari abasirikari bayo bakomerekeye mu mirwano yabereye i Sake

Ubuyobozi bw’ubutumwa bw’amahoro bw’Umuryango w’Abibumbye muri Repubulika Iharanira Demokarasi ya Congo (MONUSCO), bwatangaje ko abasirikare icyenda bakomerekeye mu mirwano yabereye mu Mujyi wa Sake.

Kuri uyu wa 24 Mutarama 2025, MONUSCO yasobanuye ko abasirikare bayo bo mu mutwe w’ingabo zidasanzwe, FIB, bari kwifatanya n’aba RDC mu gusubiza inyuma abarwanyi ba M23, by’umwihariko muri Sake, binyuze muri ‘Operation Springbok 3’.

Yatangaje ko abasirikare bayo barashe ku birindiro by’abarwanyi ba M23 muri Sake mu masaha 48 yashize, banashyira ibikoresho byabo mu nkengero z’Umujyi wa Goma kugira ngo bawurinde gufatwa.

MONUSCO yasobanuye ko mu gihe yari ihanganye na M23, abasirikare bane bayo bakomeretse tariki ya 23 Mutarama, abandi batanu bakomereka tariki ya 24 Mutarama 2025.

Tariki ya 22, iya 23 n’iya 24 Mutarama, M23 yaburiye abasirikare ba MONUSCO, ibamenyesha ko ifite uburenganzira bwose bwo kwirwanaho mu gihe babagabaho ibitero, bifatanyije n’ihuriro ry’abajenosideri.

Ihuriro M23 yise iry’abajenosideri rigizwe n’Ingabo za RDC, Umutwe wa FDLR washinzwe n’abakoze Jenoside yakorewe Abatutsi mu 1994, imitwe ya Wazalendo n’abacancuro b’Abanyaburayi.

Uyu muburo kandi wahawe ingabo z’Umuryango wa Afurika y’Amajyepfo (SAMIDRC) na zo ziri kwifatanya n’iri huriro mu kugaba ibitero ku birindiro bya M23, by’umwihariko kuva abarwanyi bayo bakwinjira muri Sake tariki ya 23 Mutarama.

Source: IGIHE