Tanzania: Umugore yatangaje ko agiye guhangana na Perezida Suluhu mu matora
Umuyobozi w’ishyaka ritavuga rumwe n’ubutegetsi muri Tanzania rya ACT Wazalendo, Dorothy Semu, yatangaje ko azahangana na Perezida Samia Suluhu mu matora y’Umukuru w’Igihugu ateganyijwe muri uyu mwaka.
Dorothy Semu yatangaje ko Abanya-Tanzania bamaze guhaga akababaro baterwa n’ishyaka riyoboye rya Chama cha Mapinduzi (CCM).
Yabitangarije mu kiganiro n’abanyamakuru ku wa 16 Mutarama 2024, ku cyicaro cy’iryo shyaka, aho yavuze ibintu bine byatumye ashishikarira kuzahangana mu matora y’Umukuru w’Igihugu ateganyijwe mu mpera z’uyu mwaka.
Muri ibyo yavuze ko harimo ko ikiguzi cy’ubuzima muri Tanzania gikomeje kwiyongera bikagira ingaruka ku banya-Tanzania benshi, ubushomeri bwinshi mu rubyiruko no gucunga nabi umutungo w’igihugu.
Yagize ati “Tanzania ikeneye ubuyobozi bushya buzarinda inyungu rusange z’igihugu, bukubaka ubukungu bukomeye, bugatanga amahirwe angana ku banyagihugu ndetse bukubaka guverinoma ikorera mu mucyo.”
“Ibi dushobora kubihindura dukoreye hamwe, tugakuraho izi mbogamizi tukubaka ahazaza heza h’igihugu cyacu […] Niteguye guhangana na Perezida Samia Suluhu Hassan mu matora ateganyijwe mu 2025, bivuye ku kuba ishyaka ryanjye rya ACT Wazalendo ryantoranyijwe nk’uzarihagararira mu matora y’Umukuru w’Igihugu.”
Semu yakoreye leta imyaka 17 mbere y’uko asezera akinjira muri politike, aho yakunze kugaragaza ko icyabimuteye ari ukugira ngo ahangane n’ibibazo birimo kutagira politike ihamye y’ishoramari muri Tanzania, kudashyira mu bikorwa uko bikwiye imishinga y’iterambere, ndetse na ruswa n’inyerezwa ry’umutungo muri Guverinoma
