CAN 2025: Misiri yatsinze Afurika y’Epfo iba iya mbere yarenze amatsinda y’Igikombe cya Afurika

Ikipe y’Igihugu ya Misiri izwi nka “Les Pharaons” yabaye iya mbere yarenze amatsinda y’Igikombe cya Afurika cya 2025, nyuma yo gutsinda Afurika y’Epfo igitego 1-0 cyinjijwe na Mohamed Salah.

Misiri yafunguye amazamu ku munota wa 45, kuri penaliti yinjijwe na Mohamed Salah nyuma y’ikosa yakorewe na Khuliso Mudau wamukoze mu maso bari mu rubuga rw’amahina.

Mu minota y’inyongera, mbere y’uko amakipe yombi ajya kuruhuka, Misiri yahise isigara ari abakinnyi 10 mu kibuga kubera ikarita itukura yahawe Mohamed Hany wakandagiye Teboho Mokoena akabona ikarita ya kabiri y’umuhondo.

Misiri izahura Angola mu mukino usoza iyo mu Itsinda B uzabera i Agadir ku wa Gatatu Saa Kumi n’Ebyiri mu gihe Afurika y’Epfo izahura na Zimbabwe i Marrakesh.

Ibihugu byombi byakinaga umukino w’Umunsi wa Kabiri w’Amatsinda ya CAN 2025, wasifuwe n’Umurundi Ndabihawenimana Pacifique mu gihe Umunyarwanda Uwikunda Samuel yari Umusifuzi wa Kane.