by 
APR FC yageze muri ½ cy’Igikombe cy’Amahoro isezereye Gasogi United yatsinze ibitego 4-0 mu mukino wa 1/4 wo kwishyura, biba ibitego 4-1 nk’igiteranyo cy’imikino ibiri.
Umukino wo kwishyura wabereye kuri Kigali Pelé Stadium kuri uyu wa Kabiri, wakurikiye ubanza wabaye mu cyumweru gishize.
Kuri uyu mugoroba, mu minota 10 ya mbere, amakipe yombi yabonyemo uburyo bubiri, ubwa APR buboneka kuri coup-franc yatewe na Memel Dao, Ishimwe Abdul ashyizeho umutwe umupira ujya ku ruhande.
Ni mu gihe Gasogi United yagerageje ishoti ryatewe na Byiringiro Jean Gilbert, umupira uca hejuru gato y’izamu rya APR FC.
Gasogi United yahise ibona ubundi buryo butatu mu minota 10 yakurikiyeho, Ndikumana Danny atwara umupira wasubijwe inyuma na Nshimiyimana Yunussu n’umutwe; awuteye mu izamu ukurwamo na Hakizimana Adolphe mbere y’uko Hakim Hamiss awusongamo ukajya hejuru.
Ngono Guy Hervé na we yagerageje ishoti ku ruhande rwa Gasogi United, umupira ufatwa neza na Hakizimana Adolphe.
APR FC yashoboraga gufungura amazamu ku mupira Djibril Ouattara yahaye William Togui, awuteye ujya ku ruhande.
Ni ko byagenze kandi ubwo Mugisha Gilbert yakinanaga na Memel Dao mu rubuga rw’amahina, uyu Munya-Burkina Faso ateye ishoti rijya ku ruhande.
APR FC yakomeje gusatira, yahushije kandi uburyo bw’umupira watewe na Mugisha Gilbert ugafatwa na Ndayambaje Léandre.
Byasabye gutegereza umunota wa 33, APR FC ifungura amazamu ku gitego cyatsinzwe na Byiringiro Jean Gilbert nyuma y’umupira wavuye kuri Niyomugabo Claude ugakora ku mutwe wa William Togui.
Mu minota y’inyongera y’igice cya mbere, APR FC yabonye koruneri yatewe na Memel Dao, umupira usanga Djibril Ouattara watsinze igitego cya kabiri n’umutwe.
Mu minota itanu ya mbere y’igice cya kabiri, APR FC yabonye koruneri yatewe na Dao, umupira usanga Ishimwe Abdul wawukinnye n’umutwe, usubizwa inyuma n’umutambiko w’izamu.
APR FC yahise yongera kurema ubundi buryo, Memel Dao acomeka umupira wafashwe na Willim Togui wacenze umunyezamu, ateye umupira ugiye kurenga ujya hanze.
Ku munota wa 56, gukora cyane kwa William Togui kwamuhiriye ubwo yarobaga umunyezamu Ndagijimana Léandre, atsinda igitego cya gatatu ku mupira wahinduwe na Djibril Ouattara.
Nyuma y’iminota ine, gukinana neza hagati ya Dauda Yussif na Togui byavuyemo uburyo bw’umupira watewe na Mugisha Gilbert ufata umutambiko w’izamu, ugarukiye Memel Dao watsinze igitego cya kane.
Ku munota wa 82, Gasogi United yasigaye ari abakinnyi 10 mu kibuga ubwo Iradukunda Axel yahabwaga ikarita itukura nyuma yo gukura Mamadou Sy wari umusize, agiye kwinjira mu rubuga rw’amahina.
Muri ½, APR FC izahura n’ikipe izakomeza hagati ya Etincelles FC na Bugesera FC.
Bugesera FC yatsinze igitego 1-0 mu mukino ubanza mu gihe uwo kwishyura uzabera i Rubavu ku wa Kane Saa 15:00.
